<indermuehle.net>

Di beide Konzärt vom Variaton ir Dampfzentrale sy, us mire Perschpektive vo ganz hingen im Orcheschter, hammermässig gsy, psungers d ffff-Passage ufem Snare! Der This het sogar es Fötteli online gschteut, obschon er mit syne Adams Timpani het Müe gha.

Uf auf Fäu han i Luscht übercho, wider meh z trummle, u ii däm Zämehang bin i uf interessante Läsestoff gschtosse: Hirnscans hei zeigt, das aui Vorurteil über Jazzer schtimme u das die sech tatsächlech nüt überlege. Es isch viu besser aus das: Bim Improvisiere sy ähnlechi Hirnregione aktiv, wi bim tröjme. Immerhin cha me aafüege, das Schlagzüger gschyder syge.

Wüus mau en Überschrift im Blog isch gsy, het sech der Fritteli no möge psinne, was i letscht Jahr am GP für ne Zyt ha gha. U wü sech Blogtitle anschynend eso guet im Gedächtnis vom Fründeskreis feschtsetze, chan is nid la sy, mini Zyt vom letschte Samschtig hie z verewige. Schliesslech isch das ja eine Selbstbeweihräucherungswebsite.

Es isch en ungloublech heisse Louf gsy. Ar Loufstrecki entlang hets mire Meinig naa zweni Wasserschteue gha (oder si si no nid gfüut gsy wi die bim Tierpark) u nume dank de Goofe wo mit Garteschlüch am Trottoir gschtange sy u desumegchoslet hei, han i ke Hitzschlag übercho. Mit der Loufzyt bin i sehr zfride: ha unger 1:10 wöue mache u für das i am Vortag no mit Verdacht uf Blinddarm ir Röntgeröhre gläge bi, beklagen i mi überhoupt nid.

No zu de Blogtitle: Dä Mechanismus vor Erinnerig wo der Fritteli eso ydrücklech demonschtriert het, cha me natürlech bruche für subliminal messages z platziere für ds Verhaute vo de Kollege z manipuliere ohni das sis merke. Drum syt nid erschtunt, we itz de eso Blogtitle chöme wi “Ich lade Sam gerne zum Bier ein” oder “Ich mache Sam den Frühjahresputz”.

Vor ere Wuche isch mys nöje Hustierli vo Amerika cho: e Roomba, e Putzroboter, wo usgseht wien e grosse Iishockey-Pögg. Der Beschrybig nache fahrt er allei ir Wohnig desume u sugt u bürschtet aus, won ihm i Wäg chunnt. Orientiere tuet er sech mit Putsch- und Infrarotsensore. Stägetritte bemerkt er mit de Klippe-Sensore, wo ne aahaute, wen er d Nase über ne Abhang use het. Putze tuet er mit emne Syttebäseli, zwone Bäsewauze und emne Suger.

Bym Stromaaschluss hets ds erschte Gnifu gäh: Ds Netzgrät us Amerika vertreit nume 110 Volt. En originau Trafo für 220 Volt chönnt me bsteue, aber werum choufe, was me cha häcke: Im Roombaforum uf em Internet isch der Umbou beschribe.

Mit emne Druck uf e «Clean»-Chnopf macht sech der Pögg uf e Wäg dür ds Wohnzimmer. Ds erschte Mau het er sech nach es paarne unsichere Kurve entschide, Richtig Büechergsteu los z sure. Vor der erschte Wang het er brämset u isch ganz süferli dra häre, het sech drääit u isch ere entlang gfaare. I Cherzeständer, wo ihm im Wäg isch gstange, isch er vou Garacho yne gfreeset, aber nach ere Voubrämsig het er rund um ne ume putzt und isch wyter der Wang entlang. Nach ere haub Stung isch ds Wohnzimmer tipptopp suber putzt gsy, und är het sech mitere Fanfare ufe Wäg zur Ladestation gmacht.

D Navigationsfähigkeite sy erstunlech, aber charakterlech het er e Tendänz, sech z überschetze. Er isch e Spur z abentüürluschtig, wen er es Hindernis wott erchlättere. U wüu d Klippe-Sensore der Ungerschid zwüsche Absätz, won er cha drüber styge, u söttige, wo z höch sy, nid erkennt, isch er o scho i d Chuchi gfaare u nümm usecho.

Nach ere Wuche wett i ne nümm misse, d Wohnig glänzt, u i ha mi sehr an e gwöhnt: I grüessen e, wen i hei chume, luege, ob er gnue Strom het, u schimpfe, wen er e Cherzeständer aagryft oder es Stueubei wott bestyge. E Roomba chouft me nid, me adoptiert ne. Är het übrigens no ke Name, wär e gueti Idee het, cha mer da unger e Kommentar schrybe.

Mym Winterpony han i es schpezieus Gudi spändiert: Ganz schlaui Pedaukurble. D Reklame und d Fürschprächer vo däm Produkt u sym tümmere Cousin, de Powercranks, phoupte, es syg di effiziäntischti Trainingsmethode sytt der Erfindig vom Hochrad. I bi chli skeptischer u lueges aus interessanti Schpilerei a. Es sy Pedaukkurble, wo vonenang losglöst sy, im Prinzip e Freilouf für jedes einzelne Pedau. Das hedütet, das me ds hingere Pedau nid cha ufetrücke dür das me mitem vordere abe geit, sondern me mueses bewusst u aktiv ufe zieh. We me das nid macht, trückt me ds vordere pedau abe, u ds hingere blybt wos isch, u das gseht de eso us.

I diversne Forayträg hei Lütt, wo di Kurble bruche, gschrybe, der Aafang syg schwär u me würds grad mau füf Minute schaffe. I ha glachet u tänkt, das sygen eso Schtutzabbrämser u Rotliechtabsteher, aber byr erschte Fahrt bin i de schön uf d Wäut cho. Churz gseit: Da muesch nöj leere Velofahre! U vor auem tüe eim da Muskle a Schteue weh, we me gar kener Schteue het! Gnadelos wird ds schwechschte Glied ir Chötti vom runde Tritt ufdeckt, u das isch der Iliopsoas wo ds Bei ufe zieht. Ds erschte Mau han is grad mau bis zum Eigerplatz abe gschafft bis mer beid Füess dunger si blibe hange und i d Pedau ke Cantimeter me ha ufe pracht. Zum Glück sy di Cranks äbe smart, u me cha se yraschte so dases normali Pedaukurble sy, u de bin i glych nid blybe hocke.

Ungerdesse geits scho ordli guet mit Pedau ufe zieh und i fa afa di angere Velofahrer verwirre, indäm i se überhole u när mau mit jedem Bei einzu pedale, u de mit beidne glychzytig uechen u ache ga. Gseht komisch us, isches o, aber es fägt.

Gopf, d SF-Vidos schtottere wi Anton! Isch das nume bi mir eso? Regt mi uf. U uf mis Mail han i no ke Antwort übercho.

Soli. Si isch sicher es Jahr bi mer umegläge, u letscht Nacht han i se ändlech zum Läben erweckt: di chlyni Fonera. Has natürlech nid chönne la sy u ha drann umepaschtlet u d Freewlan Addons inschtalliert. Itz hocket sy nume mitem Strom verbunde ufem Fänschtersims, u isch im “Quasi Repeater Modus”, wo sy d Internetverbindig nid über ds Kabu sondern über mis angere WLan härschteut, und wis tänkt isch ds private und ds öffentleche Signau zur Verfüegig schteut.

I ha no Fon-Yladige ds vergäh, we öpper e Fonera für €5.99 plus Versand (ca. 20 Schtutz) wett, cha me mer unge e Kommentar ytrage. I hiufe gärn bir Installation, nid das di nöje Foneras o es Jahr umelige…

Ds Zürcher Handusregischteramt schteut eim e huufe gäbigi Merkbletter zur Verfüegig, wo eim ds yreiche vore Aamäudig chöi erliechtere. Für ússländischi wíchtigi Dokumänt verlangt ds HRA grundsätzlech en Übersetzig, das schteit ömu im Punkt 9. vom Merkblatt Formelle Anforderungen an Handelsregisterbelege.

Das Amt isch aber glych überus lingophil, u grad wes úm vom Usstärbe bedrohti Nischesprache geit o sehr patriotisch: Für nid eso wíchtigi Dokumänt giut nämlech, dass “in der Regel das Einreichen einer Übersetzung nicht erforderlich [ist], wenn der Beleg in leicht verständlichem Französisch, Italienisch, Rätoromanisch oder Englisch abgefasst ist.”

Wo itz auerdings d Gränze zwüsche liecht verschtändlechem u schwirigem Rumantsch düre geit, han i nid chönnen erfahre.

I luege no hüffig Videos uf der Website vom Schwitzer Fernseh. Vor enes paar Wuche hei sy d Streams vom Real-Format uf ds Flash-Format umgschteut. Was dermit nümm müglech isch, isch das me der Stream imne externe Player abschpiut, wos z.B. ungerschtützt das mes udem Desktop darschteue.

Itz han i ds fougende Mail a webmaster@sf.tv gschickt, mau luege, ob öppis zrugg chunnt.

Sehr geehrte Damen und Herren

Seit der Umstellung der Videos auf das Flash-Format ist die Bildqualität im Vollbildmodus erheblich schlechter als es im Real-Format war. Auch war die Möglichkeit, den Stream in einem externen Player abzuspielen, sekr praktisch, da unter anderem das Video so als Desktophintergrund dargestellt werden konnte.

Der Abbau der Qualität und der Funktionalität der Website ist sehr bedauerlich. Bestehen Pläne, diese wieder auf das vorherige Niveau zu heben?

Freundlich Grüsse
Samuel Indermühle

Das sech usgrächnet am Bärner Ussichtsbärg es Päärli i ne perspektivelosi Beziehig manövriert, het mer scho chli ds dänke gäh. Woni letschti vom Güsche Richtig Chäsiz abegsecklet bi, bin i are Weid verbi cho, won es par Guschti, e Muni u zwöi Ross yzunet gsy sy. D Guschti hei graset oder sy daagläge u hei gchöjet u ds einte Ross het liecht glängwylet uf d Schtadt abe gluegt.

Ds angere Ross u der Muni hingäge sy, chli vo den angeren ewäg, zfride bynang gschtange u hei sech d Büch anenang gribe, ds Ross isch liecht hinger em Muni gschtange won im knapp bis Mitti Buch isch cho. Ds Ross het der Muni zärtlech hinger em Ohr knäbberlet u dää het sechs wohlig la gfaue, di beide hei richtig gschmuset zäme. Der Pascha het mängisch chli der Gring trääjt das d Madame o ds angere Ohr oder zwüsche de Hörner knabberi, u är het derby zfride gschnoubet u mängisch sy Nasering gschüttlet.

Di Szene han i der Kollegin Lehrerin verzeut u mi gwungeret, werum äch das Ross mit däm Muni umemiech. Dä syg ja zwar ja scho schtouz behange, aber e richtige Hängscht syg er de glych nid, u di wäre schliesslech no viu schprichwörtlecher, u überhoupt schtöng di Beziehig ungeremne schlächte Schtärn, heig doch der Muni evidamment ds churzi Bei für di groossi Dame profondammänt ds beydrucke.

Di kreativi Lehrerin hett de gfunge, das syg kes Problem, ds Ross müessi eifach chli am Hang abeschtah. Wo si rächt het, het sy rächt, oben am Hang isch d Ussicht füre Muni besser.

Beim Stöbern auf Ricardo über die folgende Erklärung gestolpert:

“Steht wieder zu verkauf da der letzter Käufer nachhinein märten und in Ratten zahlen wollte!”
(Quelle)

Das hätte ich auch nicht akzeptiert!