<indermuehle.net>

Hütt hei ds Züri d Giele gschosse, u das schynt Grund gnue ds sy, d Schtadt ds beflagge und e haube Tag frei ds gäh. Anschynend isch das der höcher Fyrtag aus der Zibelemärit, a däm han i nämlech no nie meh Fahne gseh aus schüsch o ging, u frei hets o nid gäh; im beschte Fau am vieri schtatt am füfi Fyrabe das me i Glüehwy cha. Da chönnt Bärn no öppis leere vo Züri. I ha mi de glych nid de Zürcher unsitte häregäh u ha am Namitsch büglet (derfür gani i morn u am Mitwuch früecher, de längts mer ids Salsa).

Der Brünu het mer bim Zmittag dervo verzeut, dass am Aabe no d der Monday Night Ride syg. I ha drufabe gmeint, der This heig mi ab und zue gfragt obi a dä ds Bärn mitchäm, aber obschon i gärn Inline-skeiti sygi no nie derzue cho. Aber ja nenei het der Brünu gmeit, das syg öppis angers: ds Züri faari si mit de Töffen us. Nume Maschine überemne haube Liter sygi yglade, u es heig 80% Harleys. Die heig i o no geil gfunge won i 15i syg gsy, u der Brünu het gmeint mit 50i interessier mi das de o wider.

I ha di Gschicht ume vergässe bis am Aabe won i uf ds Tram ha wöue füre Zug ds verwütsche. Vom Büro zur Tramhautschteusys öppe 30 Meter, i mues nume über ei Näbestrass u bi dert, u entsprächend knapp verlan i aube ds Büro. Woni zum Fuesgängerstreife bi cho, passierts:

E Töff.

Ja nid nume eine, nei! Zwe, drei, vier, es ganzes Chossignon vou sy da desumeknatteret u hei rumooret u giggset u ufemasfautumegümelet, das es eim eso richtig vorem Fuessgängerstreife blockiert het. I ha öppen e minute gwartet u bi zimlech ungedùudig worde, wüu wes mer nid uf das Tram glängt hätt, hätti e haub Schtung müesse warte u das hät mi aagschnäggelet, nume wäg dene wo i ihrer Freizyt zum Schpass organischi Materie verröschte. (Ökologische Yschub: I weiss, es geit ja gar nid drum, viu Bänzin ds verbrönne, es geit um ds Fyyling! I dänke de bir nächschte Bärgwanderig, woni der Gletscher suche wo uf der Charte no yzeichnet isch, aber sech ungerdesse us sym Tääli dervo gmacht het, gärn wider a öjes Fyyling.)

Item, i ha ds Tram gse derhär cho u di Töffschlange het u het nid wöuen ufhöre, so fescht win i o göjgt ha. Es schynt eso ds sy, das eine mitemne Neonorange Überzug d Schtrass blockiert das der Konvoi düre cha, u da lö sy sech nid gärn la schtöre derby. Wo mis Tram de bir Hautschteu ghaute het, hets mer gnüegelet: i ha der Arm usegha und dermit grächnet, das di nächschte Manne abschtyge u mi chly mache wi d Brönggle ufem Gurte die wo kes Billjee hei, aber siehe da: aaschtandslos hei si ghaute u glächlet u mi höflech verby gwunke u bi bi zum Tram gsecklet tu es het mer no glängt.

U wider isch d Wäut umne Gschicht rycher: Vom Bürolisten, der das Tram nicht verpasste und wie gewohnt nach Hause kam. Wow, der Autag isch doch so schpannend. Wär het nöjme gseit “Der Alltag findet im All statt.”?

This entry was posted on Monday, September 11th, 2006 at 9:49 pm and is filed under Bärndütsch, Bärn-Züri. You can follow any responses to this entry through the RSS 2.0 feed. You can leave a response, or trackback from your own site.