Zürcher Guillotine
D Tram ds Bärn sy scho bequem. Di ganz aute hei zwar u herti Houzsitze, derfür wärde di Brättli won e Heizig ungedrann hei im Winter schön warm. Di mittleri Generation isch ja tiptop u bequen, u o i de Combinos laat sechs la reise, ömu we me hochseetouglech isch us eim vom schüttle nid schlächt wird.
Ds Züri hei si schiggi Cobras, aber di faare nid uf mire Linie. Die Tram wo derfür aube derhär chöme, bewege sech äuä zwüsche der eutischte u der zwöiteutischte Generation Bärnertram u glyche sehr am blaue Bähndli, eifach mit Türen uf nume eire Sytte.
U genau die Türe heis i sech. We si ufgöh klappets unger eso nes Gitter aus erschte Schtägetritt abe u we me druf schteit, geit d Tür nid zue. Bir Sihlposcht isch aber dä Schtägetritt tiefer aus ds Perron, si heis nöj gmacht u erhöht, das me bequemer cha yschtige. Dasch ja nume guet gmeint.
Won i äbe geschter Morge dert ygschtige bi - no nid ganz wach u wäg der Musig i den Ohre vertröjmt u totau abgschottet - tschaupen i natürlech nid zersch vom Perron abe uf das Gitter füren Ufschtig ids Tram vo dert Aadsgaa, sondern bi so flink wis haut am Morge früech ggangen isch gradus ufe zwöit Tritt los. U chum bin i dert abgschtange, gsen i us de beiden Ougewinkle vo linggs u rächts öppis schwarzes uf mi zueraase, gschpüre wis mer d Täsche a d Bei u d Schùutere a d Backe trückt u bi i dere Schysstramtür ygchlemmt gsy.
Es höflechs Bärner Tram hätt itz das doch gmerkt, u hätt mi wider losglah, aber ds Züri geits chli zackiger zue und här: we d Türe zue mues, de geit sy zue, o we no e Passagier im Wäg isch. Öpper im Tram het de erbarme gha u het der Chopf drückt, de bi de glych no us der Türen use u i ds Tram ine cho.
I schleisse mi Mänus Theorii übere Morge aa…
September 21st, 2006 at 10:10 am
Das tönt ja ungloublech gfährlech! I bi auso scho froh, wohneni im gmüetleche Bärn mit de fründleche Tram.