Lokaupatriotisches Höhefieber
Mit es paarne Budekollege gan i regumässig übere Mittag ga jogge. Dasi einigermasse fit bi, secklen i zwüschedüre o no ufe Gurte ufe. Obe bin i aube rächt ufem Latz, aber mit echli lokaupatriotischer Yschtellig entschädiget eim d Ussicht über ds schöne Bärnerland (das wär itz di lokaupatriotischi Yschtellig gsy, ds schteigere nume no dür nes “üses schöne Bärnerland”) füre ryyssend Schmärz vom Sytteschtäche, ds Chratze i der Lunge u di brönnigen Ouge vom Schweiss unger de Linse.
Szenewächsu: Vo mim Bürotisch gseh i ufe Zürcher Gurte, dä mit de zwo Antenne. (U di einti lüchtet sogar rot!) I ha ging gfunge, der Gurte syg schöner, höcher (absolut aus o relativ) u herter zum seckle, u me heig ja eh di schöneri Ussicht.
Letscht Wuche heis dr Jürg u i wöue wüsse u sy für üsi mitäglechi Joggingrundi i d Saauschporthaue gfaare u sy dä Hoger vo dert us aagange. I fasse mi itz churz: Der Üetlibärg isch schteiler u herter aus der Gurte, u d Ussicht a däm Föhntag isch eifach der Hammer gsy! Mi Lokaupatriotismus het no es Näggi meh übercho, won i ha d Höchine vergliche:
Aare bim Schönoustäg: 502 m.ü.M.
Gurte: 864 m.ü.M.
Differänz: 362 m
Saalsporthalle: 422 m ü. M.
Üetliberg: 869 m ü. M. (merd, gschlage)
Differänz: 447 m (merd, nomau gschlage!)
Auso, lö mers, ds Züri isch haut aus eifach chli grösser. Aber ä schtääiler…