Verspäteti Eiertütschete
oder: Früecher hei d Büezer no gwüsst, was e glatti Sach isch.
Der Bund schrybt hüt, das im Kanton Bärn d Bevöukerig nume schwach wachsi u der Kanton dört zu de Schlussliechter ghöri.
Syt zwo Wuche plaaget mi der Verdacht, dä Trend sygi husgmacht. Sitt zwo Wuche nämlech han i Kompensationszyt, bi ds Bärn u wider ufem Velo ungerwäggs. I mues vilech no säge, das ja eigentlech Blogyträg über ds Velofaare us Tradition em Fritteli sys Metier sy, aber i grase itz ungerem Zun düre u briche das Monopol us aktuellem sozio-politischem Aalass. (U i hoffe, der Fritteli gsäch di Not y u verzög mer hie.)
Item, i bi auso ds Bärn ufem Velo ungerwäggs, uf mym aute Renner u Renner sy eifach hert pumpet. Das tönt nachemne Detail, isch hie aber wäsentelch u erklärt vilech o, werum sech der Fritteli no nid über das Problem het usglaa; är dünkt mi mindischtens äbeso betroffe, aber er het ja ke Renner u drum o nid ganz eso hert pumpet, u mit däm Hiwys chöme mer der Sach scho neecher.
Auso, i fahre schier täglech vom Thunplatz zum Helvetiaplatz d Jungfroustrass dstürab. Dört sy si ja scho lenger am pickle u baggere, u einisch hei sy e zümftige Teu vor ufgschrissne Strass wider ausphautiert gha, u wider ufgschrisse u nöi asphautiert, oder eifach zviu Asphaut gha und es paar Hüüfeli gmacht u chli aatäberlet. Über di Bùggupischte wo derby isch usecho, faart me itz mit Garacho vom Thunplatz obenabe. U mit däm Spiid u de hert pumpete Pnöö rasslet u houperet u schüttlet u vibriert u schlaat u rüttlet u zitteret u sheiket u polet u schtüpft u schanghanigzigerlifisionöögelet das eim der Sattu zwüsche de Bei umenang das i mi nüm frage, obi mau Ching wott, sondern obi äch no cha ha wen i bin Helvetiaplatz ungen aachume! Was söu de das, gitts es Edikt usem Münschter wo d Castrati wider yfüert, oder het ds Tiefbouamt der Strassename z wörtlech gno u gfunge “so, u wär’s nid isch, wirds itz!”?
I hoffe eifach, bevor sy d Boumaschine mitnäme, mieche sy no e letschti Schicht Asphaut drüber, schüsch gsen i schwarz für e Kanton.
April 29th, 2007 at 4:03 pm
Chönnt’s nid o am Sattu liege? Du hesch rächt: Für i d’Stadt bruucht me hütt ender es BMX aus es Rennvelo.
April 29th, 2007 at 4:50 pm
E wunderbare Ytrag!
I bi dir mitnichten bös, dass du ds Monopol bbroche hesch. Im Gägeteil: ig fahre itz scho sit mehrerne Mönet geng nume no d Thunstrass ab u nümme d Jungfroustrass, aber di Ytrag het mi gluschtig gmacht, u i dänke, i mues es wider einisch usprobiere. U mit de weniger hert pumpete Reife hesch bi mim Velo rächt: vorne het’s sogar au paar Täg pladi. Aber zum Glück hani ja e Pumpi.
April 29th, 2007 at 7:49 pm
This, es ligt tatsächlech am Sattu, aber obs ohni dä bequemer wär, bezwyflen i ;-). Im Ärnscht: der Sattu vo mim Aute Renner isch relativ weich.
Fritteli, überleg s der guet, e höchi Stimm vom Helium geit nämlech wider verby, im Gägesatz…