01:09:18
Wüus mau en Überschrift im Blog isch gsy, het sech der Fritteli no möge psinne, was i letscht Jahr am GP für ne Zyt ha gha. U wü sech Blogtitle anschynend eso guet im Gedächtnis vom Fründeskreis feschtsetze, chan is nid la sy, mini Zyt vom letschte Samschtig hie z verewige. Schliesslech isch das ja eine Selbstbeweihräucherungswebsite.
Es isch en ungloublech heisse Louf gsy. Ar Loufstrecki entlang hets mire Meinig naa zweni Wasserschteue gha (oder si si no nid gfüut gsy wi die bim Tierpark) u nume dank de Goofe wo mit Garteschlüch am Trottoir gschtange sy u desumegchoslet hei, han i ke Hitzschlag übercho. Mit der Loufzyt bin i sehr zfride: ha unger 1:10 wöue mache u für das i am Vortag no mit Verdacht uf Blinddarm ir Röntgeröhre gläge bi, beklagen i mi überhoupt nid.
No zu de Blogtitle: Dä Mechanismus vor Erinnerig wo der Fritteli eso ydrücklech demonschtriert het, cha me natürlech bruche für subliminal messages z platziere für ds Verhaute vo de Kollege z manipuliere ohni das sis merke. Drum syt nid erschtunt, we itz de eso Blogtitle chöme wi “Ich lade Sam gerne zum Bier ein” oder “Ich mache Sam den Frühjahresputz”.
May 17th, 2008 at 3:40 pm
… u we me bimne Kommentar o e Titu chönnt gä, de schrùùb (Konjunktiv vo “schribe”?) i hie: “Dr Sidi bringt am Fritteli gärn no es paar Bärner Müntschi verby!”
I gratuliere zur Unter-1:10-Zyt!
May 18th, 2008 at 1:01 pm
*Augen verdreh* Bärner Müntschi bringe… Bärner Müntschi bringe… Bärner Müntschi bringe…
May 18th, 2008 at 8:37 pm
Sidi, zum Putze hesch ja itz ä Roboter. Da bruuchts üs däich nümm. Oder isch dr Roomba öppe doch nid so guet?
May 18th, 2008 at 9:13 pm
D Fänschter macht er nümm, sitt das i ihm ha ds Chlättere verbotte…