Merci, VeloPlus!
Geschter ufem Bantiger han i bim Velo ar Sattustützi umegschrüblet u won i se z grächtem ha wöue aazieh, hets es hässlechs Grüsch gäh, u ds Schrübli vor Chlemmi isch prochnigs gsy. U ohni Stützi isch der Sattu eifach mau nid eso stabiu, u ufene lodelige Sattu hocke geit nid, scho nume us Angscht vorem ne Näggi am Rahme oder emne Chratzer im Lagg überem Karbon. (Mon dieu, e Chratzer im Karbon!!)
Ständligse bini haut de uf Bolligen ache gfaare (isch im Fau nid eso luschtig, ohni richtig chönne z hocke der Bantiger abe ds heize, isch en instabili Sach), u de wytter uf Ostermundige, ir Hoffnig, es läng mer no vor de füfe i VeloPlus. Leider isch churz nach Ladeschluss gsy won i bi aacho, aber won i am Fänschter ha Bittibätti gmacht, hei sy mer no einisch uftah. Bi u froh gsy, das i um die Zyt no bi vom ne Mech bedient worde, u mir hei de das Velo ume zwäg gmacht u itz isch aus wider picobello.
Merci viumau, VeloPlus für di unkomplizierti Hiuf um die Zyt!