<indermuehle.net>

Beim Stöbern auf Ricardo über die folgende Erklärung gestolpert:

“Steht wieder zu verkauf da der letzter Käufer nachhinein märten und in Ratten zahlen wollte!”
(Quelle)

Das hätte ich auch nicht akzeptiert!

Wes bymne Produkt kener Verbesserige me gitt, isch doch das es Zeiche, das es usgryft isch u sech düregsetzt het u niemerem öppis bessers i Sinn chunnt. Niemer nörgelet me drann ume, me chas la sy wis isch u es isch guet eso, u dadermit wär das Produkt, me chas säge: Perfekt. Vouändet. Unüberträfflech. Intelligänt disäint.

Letschti isch mer eso eis übere Wäg glüffe, u wüu de we de das lisisch scho ds Häugeli ungernache gseesch, weisch itz o scho, was für eis, aber glych: gnau gno zwöi Mau letschti sy mer söttigi übere Wäg glüffe: Bim grand Prix ischs mer ufgfaue, u bim bim Bantiger scho wider: Trinkfläsche gse sitt 10 Jahr glych us. Lug einisch:

Linggs isch eini won i sitt sicher 10 Jahr ha, rächts die wos bim GP het gäh. Tupfgenauglych, der glych Pfnüggu obe, di glyche Kerbe am Techu, di glych gschwungni Tallie. Schlicht perfekt.

U d Morau vor Gschicht? Intelligänts Design isch für Fläsche.

Guet, dä Tittu tönt itz nachemne Schüelerufsatz, aber i kenne ke Drittklässler wo Triathlon macht, u drum bruuchi ne itz glych, u das gitt de i däm Sinn e Triathlonufsatz, woby mis Velo ja gar ke Triathlonufsatz het sondern der gwöhnlech Länker u i dänke grad, dasi immer no nid ganz grad dänke. Item. Auso.

Der Taschabi u d Noemi, mini umermüedlichi u ändlos gedùudigi Schwümmlehrerin, hei sech la überschnure, am Bantiger Triathlon ds Stettle ir Plousch-Kategorii mitdsmache. Es isch für üs aui der erscht Tria gsy, der Tschabi schwümmt zwar sehr guet, het Louferfahrig und e schigge Renner, d Noemi schwümmt o sehr guet, het o Louferfahrig, u es Velo wosi mer derwäge het aaglütte u gfragt “Chönntisch Du mis Velo äch no aaluege? Der Mech het gmeint, d Chötti ryssy äuä gly.” So schlimm isches de nid gsy, I ha es Pintli Öu und e Pumpi mitgnoh u das Mountainbike gschmiert u d Brämse nachezoge u d Pnöö wi hert pumpet, Noemi?

Woni am meche bi, chunnt en drahtigi Athletin u fragt, ob i äch o Inbusschlüssle da heigi, ire Maa heig ere e Triathlonufsatz ufe Länker montiert, u sider lodeli aus. Das Velo het usgseh wi sabotiert, der Länker isch überhoupt nid aazoge gsy u bir erschte haube Kurfe häts die Gueti tischet. Schön, we me das mit es paarne Rotatione usem Handglänk cha verhindere. Wi sider ds Verhäutnis zu irem Maa isch, weis i nid, ha se schpäter nümm gseh.

Bir Schtartnummerenusgaab hets no Rigle und es T-Shirt gäh und e Tisch gha, wo jede eis Gratistübli Daylong-Sunnecrème het dörfe d Täsche vou hamschtere.

Wo d Velo pumpet, ds Materiau zwäggleit, d Sunnecrème uftreit u d Startnummere ggummibändlet isch gsy, sy mer i ds Hauebad ga yschwümme. Es het keni Schtartblöck gäh, me het eifach chönne säge, wenn das me wot losla. Mir sy de im 15s-Abschtang los, der Tschabi u d Noemi si mer natürlech abgschwaderet u hei eleganti Kraulrundine zoge, während i vo Rand zu Rand bi bruschtzüglet u bi jeder Cheeri tief ha müesse düreschnuufe u d Häuferin wo mini Rundine zeut het, het mer aube ufmunternd u härzlech, aber doch liecht beluschtiget zueglächlet. Der Tschabi het di 300m aus erschte fertig gha u isch ab, d Emi aus zwöits, u irgend einisch ha de o ig ds Zeiche übercho, das itz gnue syg. Ufem Wäg zur Badi use chunnt plötzlech d Emi zure Türe us u rüeft “Sidi, Sidi, wo geits hie use!?”… das isch natürlech o e Art gsy, Zyt guet ds mache.

Ds Velofaare isch guet gange (17km), aber der Yschtig i ds Lloufe (4.7km) isch ungloublech hert gsy! I ha ja gmeint, nach es par Jahr Karate (mit Stages) und es paar Volkslöif wüssi öppe, wi me vom Sport cha lide, aber so öppis wi dä erscht Kilometer han i no nie düregmacht. Wadechrampf, Syttestäche, herti Oberschänkle, usser Atem, bärguf u fruschtriert, wüu da nid meh us dene Scheichen use chunnt, dery han i doch zum Zmorge brav Wyssbrot mit Honig ggässe. Nadisnah het sech de eis Übu nachem angere ufglöst u das Löifli het afa Spass mache.

Bim zrügg cho hets mer gad schüst glängt, ga ds Handy ds hole u der Tschabi bim Zieuylouf ds knipse, u d Noemi isch de o gly cho. Ludaa:

Itz warten i eigentlech nume no, das d Zyte irgendwo publiziert wärde, wüu i ha a mire Stoppuhr irgendöpis umegfigureetlet u ha ke Ahnig, wi lang dasi ha gha.

Vorgeschter hets i de Bärnerloube u am Züriseeufer ja nume eis Gschrächtshtema gä: ds Swissairurteil. U vo de geischtige Täler vo de Blickschlagzyle bis zur Chochfinanz isch plötzlech jede en Expert zu däm Thema worde.

Vom Heizug bin i no schnäu bir Gäutschpicki ir Schanzeposcht verby. Vorusse isches schier chüeu gsy, ir Haue mit de Bank - pardon - Postomate chli wermer, u das hei zwe Penner usgnütz u sy dört inne amne Tischli näb irne Habseligkeite gschtange, hei u gschtunke u sech yfrig ungerhaute. I ha am Rand mitübercho, dase sy sech über d Abfindig wo ds Gricht de Aaklagte het zuegschproche, ufgregt hei. Bon, wär scho nid, han i tänkt, wett o söfu Gäut übercho, psungers we aus wo me het i eim Plasticsack Platz passt, nottabene no näbe ds Bier dert drinn.

Aber plätzlech han i der eint Penner ghöre säge “u es hett ja nid mau me e richtigi Gwauteteilig im Verwautigsrat gäh, si hei iri eigeten Usgabe säuber guet gheisse!”. Das het mi erschtunt! Der Gedanke vo Checks and Balances ir Bärner Gosse? D Reinkarnation vom Montesquieu mitem Prix-Garantie-Bier ir Hang? Oder zwe Hochfinanzler wo usgschtige sy füre Sinn vom Läbe ds sueche?

Uf jede Fau begägnen i de Penner sider mit meh Reschpäkt, me weis nie, wiviu Sachkenntnis sech hinger der bärtige Fassade verbirgt u wiviu Philisophie i däm abgfeerggete Mantu steckt. U vilech trifft me in es paar Jahr, nachem bevorstehende Ziviuprozäss, ja ehemaligi Swissair-Verwautigsrät ir Postomat-Haue vor Schanzeposcht bim Bier.

I ha afa schwümme, d Noemi gitt mer Ungerricht. Syt denn won i mer ha dörfe der Seestärn a d Badhose nääje (ds Seepfärdli han i nümme gschafft, wüume dört het müesse amne Gschpähndli zwüsche de Bei düre touche), bin i däm Elemänt müglechscht uswäg gange. Aber mitere Mischig us Midlife-Crisis u Sportsgeischt han i gfunge, i wöu das jahr no e chlyne Triathlon mache, u da chunnt me eifach nid um ds plantschen ume.

Natürlech mues me das zersch theoretisch aaluege u mau derna google. Und siehe da, Schwümmtipps gits nochundnoch, am beschte het mer dä hie gfaue:

“Bei Rücken und Freistil zähle, “1-2-3-4, 1-2-3-4, 1-2-3-4″ usw. um einen gleichmäßigen Beinschlag Rhythmus zu bekommen. Am besten ist der Walzertakt.”

Mir wär hüt Nami schier d Ggaffeetasse zur Taupen us gheit won i gseh ha, wär da im Schlepptou vre Sekretärin der Gang z düruf chunnt: E Tschugger mit Fangnetz u Houzchischte! Eso richtig ir Uniform mit emne lüüchtige “POLIZEI” uf de Schùuterbletter. Was wott eine mitemne Fangnetz bi üs, hei mer Hüng? Het en Ouditor vomne Chund d Touwut ygschleppet u me mues ne abtue? D Sekretärin het gseit “Gescht män me si döt foore z letsch mal gseha”, de bin i hingernache zum schnöigge

I ha sofort der Oli alarmiert wo Ussicht uf das Vordach het u är heigi gfunge, jaja, geschter syg da e en Änte mit Chlyne umespaziert u heit mitem Schnabu a d Schibe gchlopfet. Är heig scho wöue Wasser ufsetze… Der Tschugger isch de ufem Vordach hin u här glüffe, wie nes Färegschäderli amne Miuchgröözi, aber die Änte het me nümm gfunge. Är het vermuetet, sy syge über d Brüschti ggumpet. D Sekretärin het grad d Ohre la hange u sech erkundiget, ob di chline härzige Änteli das äuä chönnte überläbt ha, schliesslech sy mer im vierte Stock gsy. Der Oli het nume zfride glächlet und ufemne Zahnstocher umegchätschet u gmeint, dä Fluum stossi eso komisch uf …

Im Intercity het isches e Dame gsy, wo d Billet kontrolliert het. Churz bevor si bim Kompartimänt isch gsy won i bi ghocket, trääjt si sech um u seit öpperem wytter hinge rächt schträng: “I bi ke Kondüktöse!”

Däm säg me Kondüktörin het sy ne belehrt. Eine im Kompartimänt vor mir het gfunge, da leeri me ja no Dütsch; u richtigi Pruefsbezeichnige het si nachegschobe. Wo si mis GA het gluegt han i se gfragt, wi me de däm uf Französisch sägi. Controleuse sygi ds Zouberwort. Auso nid Conductrice, han i gmeint, nei het sy gseit, mir redi ja Dütsch hie.

Dütsch? Di Dame kontrolliert Billet u Abonnemänt u nid Fahrkarten und Dauerausweise; mir schtyge vom Perron us y u gö i di zwöiti Etage vom Waggon u nid vom Bahnsteig und steigen in den zweiten Stock des Anghängers; hocke i nes Kompartimänt (oder es Vierergascho) u nid i ne Fahrgastzellen-Viererunterteilung; u ire Kolleg isch der Kondüktör u nid der Schaffner. Merket nech das, Frou Kondüktöse, u echauffieret nech nid, we öpper e französischi Ändig brucht!

Derfür isch der Lokifüerer e Dütsche gsy u het is im gschliffnigschte Hochdütsch informiert, das im Wage 21 ir Zugsmitti d Klimaaalaag usgschtige syg u me gäge d Zugspitze söu ga hocke. Ir Höchi isches drum chüeler.

Über Uffahrt bin i mit der Mère ds Frankrych gsy, im Luberon öschtlech vo Avignon. Dert hets e Huffe chlyni Dörfli mit oder ohni römischi Ruine, Wyfäuder, angeri Fäuder u Fäudwäge wo me herrlech cha jogge druff.

Jedes Dörfli wo öppis uf sech het, het e Chiuche oder zwo, e Dorfplatz und e Dorfbrunne. U a dene Dorfbrünne, han i tänkt, chan i mi ga labe we ds Wätter doch chli warm wär zum Jogge. Aber chasch dänke!

Am einten Aabe isches no fei warm gsy, u so nachemne Haubstündli Fäudwäg abschpuele han i der Turscht i de Schläfe u der Pùus im Mage gschpürt u es het mi tünkt, wen i nid gly öppis suuf, würde d Hingerscheichleni alei nümm länge zum loufe. Sehnsüchtig han i mi im nächschte Dörfli ufe Platz gschleppt u won i ume Egge chume und der Jungbrunne vormer gseh, ghöri ds Echo vo mim Blick im lääre Trog. Ke Sturbach isch us lutschtig plätschernd us de Rühre gschosse, ke Strahl drus gflosse u kes Rinnsal drus tröfelet: Sy hei Wasserknappheit u d Brünnen abgschteut. A la bonheur, ds nächschte Dörfli isch ja nid wyt gsy, u dört ds glyche Biud: Z mitts im Dorf e Wüeschti, vorem Rathus es Sandfäud, d Schueu het ke einzige Wasserhane a krer Wang usse, der Tennisplatz o nid u bir Biblere: rien. I bi wytter dür ds lääre schtoubige Dörfli u ha gmeint i ghöri e Schnuregyge won e einsami Melodie spiut u gsuch zwe Type imne freistehende Torboge stah, aber i ha mi tosche.

Zum Glück, zum Riiseglück, zu mire rettende Erlösig isch der Fridhof bim Dorfusgang gläge gsy! Dört ir Fridhofswang han is gseh, das glitzere u glänze, das velockede Strahle, der Stärneschimmer vomne chromige Wasserhahne! I ha mi härzlech dra ghänkt u es isch nume so mi ine gschprudlet dases e Fröje isch gsy. Ha no chli drüber sinniert, das die wo scho zu Schtoub sy besser bschüttet wärde aus der Schuttplatz, u bi hei.

Poah, hüt Morgen am füfi uf für am haubi achti ömu sicher im Sitzigszimmer 0.05 ds höckle für ne Wytterbiudig i Sache Kapitauerhöhig ds konsumiere. Zim GLück hei mer e ratterigiknatterigi Espressomaschine im Gang uss. U morn no einisch ds glyche.

Vori han i vor Emi mi erscht Schwümmkurs sytt em Seepfärdli übercho, het u guet taa, u a ds Chlor i de Nasenäbehöhline gwöhnen i mi o no.

Geschter isch der GP ds Bärn gsy u i bi eine vo dene turnbeschuehte Sunnebrüuetreger gsy, wo sech vom Wankdorf ufenes schöns aber herts Ründeli hei gmacht. Nach 1h13min26sec bin i im Wankdorf zrugg gsy, bi sehr zfride.

Am Aabe hei mer ds zwöite Konzärt vom Variaton-Orchester gha. O das isch sehr guet cho, aber i has ar Konzentration aagmerkt dasi vorhär scho chli öppis ha gmacht gha. Im Le Boef Sur Le Toît han i i eire vo dene 32 Takt länge Pouse es Blackout gha, zum Glück het mi der Fritteli wider ufe richtig Wäg gfüert. U der Ramax het aus gäh!