<indermuehle.net>

Über Uffahrt bin i mit der Mère ds Frankrych gsy, im Luberon öschtlech vo Avignon. Dert hets e Huffe chlyni Dörfli mit oder ohni römischi Ruine, Wyfäuder, angeri Fäuder u Fäudwäge wo me herrlech cha jogge druff.

Jedes Dörfli wo öppis uf sech het, het e Chiuche oder zwo, e Dorfplatz und e Dorfbrunne. U a dene Dorfbrünne, han i tänkt, chan i mi ga labe we ds Wätter doch chli warm wär zum Jogge. Aber chasch dänke!

Am einten Aabe isches no fei warm gsy, u so nachemne Haubstündli Fäudwäg abschpuele han i der Turscht i de Schläfe u der Pùus im Mage gschpürt u es het mi tünkt, wen i nid gly öppis suuf, würde d Hingerscheichleni alei nümm länge zum loufe. Sehnsüchtig han i mi im nächschte Dörfli ufe Platz gschleppt u won i ume Egge chume und der Jungbrunne vormer gseh, ghöri ds Echo vo mim Blick im lääre Trog. Ke Sturbach isch us lutschtig plätschernd us de Rühre gschosse, ke Strahl drus gflosse u kes Rinnsal drus tröfelet: Sy hei Wasserknappheit u d Brünnen abgschteut. A la bonheur, ds nächschte Dörfli isch ja nid wyt gsy, u dört ds glyche Biud: Z mitts im Dorf e Wüeschti, vorem Rathus es Sandfäud, d Schueu het ke einzige Wasserhane a krer Wang usse, der Tennisplatz o nid u bir Biblere: rien. I bi wytter dür ds lääre schtoubige Dörfli u ha gmeint i ghöri e Schnuregyge won e einsami Melodie spiut u gsuch zwe Type imne freistehende Torboge stah, aber i ha mi tosche.

Zum Glück, zum Riiseglück, zu mire rettende Erlösig isch der Fridhof bim Dorfusgang gläge gsy! Dört ir Fridhofswang han is gseh, das glitzere u glänze, das velockede Strahle, der Stärneschimmer vomne chromige Wasserhahne! I ha mi härzlech dra ghänkt u es isch nume so mi ine gschprudlet dases e Fröje isch gsy. Ha no chli drüber sinniert, das die wo scho zu Schtoub sy besser bschüttet wärde aus der Schuttplatz, u bi hei.

Poah, hüt Morgen am füfi uf für am haubi achti ömu sicher im Sitzigszimmer 0.05 ds höckle für ne Wytterbiudig i Sache Kapitauerhöhig ds konsumiere. Zim GLück hei mer e ratterigiknatterigi Espressomaschine im Gang uss. U morn no einisch ds glyche.

Vori han i vor Emi mi erscht Schwümmkurs sytt em Seepfärdli übercho, het u guet taa, u a ds Chlor i de Nasenäbehöhline gwöhnen i mi o no.

Geschter isch der GP ds Bärn gsy u i bi eine vo dene turnbeschuehte Sunnebrüuetreger gsy, wo sech vom Wankdorf ufenes schöns aber herts Ründeli hei gmacht. Nach 1h13min26sec bin i im Wankdorf zrugg gsy, bi sehr zfride.

Am Aabe hei mer ds zwöite Konzärt vom Variaton-Orchester gha. O das isch sehr guet cho, aber i has ar Konzentration aagmerkt dasi vorhär scho chli öppis ha gmacht gha. Im Le Boef Sur Le Toît han i i eire vo dene 32 Takt länge Pouse es Blackout gha, zum Glück het mi der Fritteli wider ufe richtig Wäg gfüert. U der Ramax het aus gäh!

Letscht Frytig bin i im Tram ghocket für i ds National ga ds schwofe, da schtygt e Raglete jungi Giele bir Tür hinger mim Rüggen y u blibt dört schtah. I has e öppe 18i gschetzt u ufgschnappet “hey, gö mer i Gymer?” de chönnt das öppe häre cho. Si hei rächt gholeite, plagiert, sech aagschtigelet u gschigöggelet u aus i auem e zwar lutte, aber zfridnen Ydruck gmacht.

Plötzlech ghören i eso nes zischends Grüsch u drei fö grad afa usrüefe “Nei, Du chasch ja nüt, het das müesse sy, hey, Manno bisch so ne Sou” u i gschpüre wi sech e Schprüehnäbu Bier i mi RIchtig usbreitet. I ha mi umträjt u gmotzet, da schteit eine zwüsche Bierschprützer u mi u meint “i beschützen ech itz”. Das het mi extrem flott tünkt, das är dä Räge i sy Rügge nimmt für mi, i ha mi bedankt u är het gmeint, das syg scho rächt, är entschúudigi sech für sy Kolleg, u si gänge no i Börger king, ob i o mitchäm. Mir hei de chli über Restaurant ds Bärn plouderet u i ha gfunge das i der Inter ir Markthaue viu besser fänd aus Fast Food, dä syg aber chli tüürer aus e Hamburger.

Bis Usstige hei mer no es gimme 5 gmacht, si sy dür d Spitalgass-Passage ab u i ha se bin furtholeje ghört säge “hey, dä isch tz vou easy gsy, Mann, dä cha öppis, hey, vou druff, Mann” u bi immer no zimlech stouz, das i glych no chli derzue ghöre.

und us Rahm macht me Butter. Won i hüt der Oli gfragt ha, ob er e Gutsch Nidle i Ggaffee wöu, het er zersch chli stober dry gluegt u won i es erklärends “e Tropfe Rahm” ha nachegschobe, de gmeint, är heigi ds Wort “Nidle” scho verschtange, nachdäm ers heig chönne vo “Nidletäfeli” härleite. Ob de ds Züri nid Nidletäfeli ganz korrekt Rahmzältli müesste heisse, het er mer nid chönne säge, är heigi das no nie esoo aagluegt.

Weniger Flexibu isch e Verchöiferin bimne Beck gsy, wo der Brünu einisch es Schtück Chirschichueche het wöue. Ersch won er “en Bitz Chriesiwääihe” het prononziert, isch er zu syre Chausse cho. (U wen i “es Schtück Chirschichueche” lutt dänke, wird mer o klar, werum is üsi wäutsche Compatriotes “Chiis-Chöjer” säge. Das het übrigens o e Marokkanerin gfunge wo mi ds Casablanca bim telefoniere belouscht het.)

Das es Rittigampfi es Giräizli isch, weis i dank mire Nichte, u das mi Növöö ds Bärn schnaaget u schpoorzet u ds Züri chrüüchet u stramplet, isch ihm u mir no glych, wes de aber drum geit, ob er der Zwirbel will trülle oder der Hùrlibueb wott trääje, mues i de luege, das er aafaat Mani Matter lose.

U für das mit de Zibele hie o mau erwähnt ds ha: di heisse uf autrömisch cepa u nöjrömisch cipolla, u di romanophile Bärner hei das meh oder weniger überno während me ännet der Röiss ds knappere Bölle p’haute het. Drum het sech der Zibelemärit o nume ds Bärn düregsetzt, wüu “en Böllezopf” würd itz niemer choufe! Eso ne Ggaggoo!

I begryffe itz, werum der Fritteli eso hüffig über ds Velofahre schrybt: Niene erläbt me d Mönsche ehrlecher u niene gitts tieferi Yblicke i d Psyche (oder Psychopathologii) aus im Strasseverchehr.

Z Züri isch der 1.5. e hööche Fyyrtig u i mache d Brügg. I finges zwar ehrlecher, we die won e Job hei am Tag der Arbeit gö ga schaffe schtatt frei ds näh, eso wi ds Bärn, aber item. (Nei, i ga morn glych nid für Di ga Dini Püez mache!) Hüt isch zwar ersch der 30. Apriu, aber der Tittu wird kätschiger esoo u schliesslech han i hüt vom Velo us em Establishmend der Finger gäh, u das isch esoo choo:

Es het mi uf ds Velo u dert druff Richtig Murtesee zoge. Bim Gäbubach boue sy Lärmschutzwäng un e “neue Verkehrsführung”, u drum hets en ängi S-Kurve wo uf der rächte Sytte eso söttigi schtöh. I ha vor der erschte Kurve chli usghout u im Ougewinku gseh, das da da e Chare ufhocket u wett überhole, aber dä het itz müesse warte. Ir Gägekurve han i haut ynezoge u wider ds Gfüeu gha, är hät da verby wöue, u ir dritte Kurvei han im nid meh Platz chönne mache, schüsch hätti öppe no bi so eim vori mitem Guidon yghänkt.

Wo mer dür di Schiggaane düre si gsy git er Gas u überhout mi, eigentlech no imne rächt aaschtändige Abstand, aber wo mer uf glycher Höchi sy, laat dä Sack d Schibewüschaalaag aa, duschet mi mit Seifewasser u laat se la loufe während er a mer verbi rollt u wider i d Schpur geit.

I haute mi ja für rächt tolerant u finge, d Outofahrer dörfe d Schtrass o bruche we si sech a d Reglä haute, aber das isch mer itz ds wytt ggange. U wüus e Merz isch gsy han i gfunge, we eine der Finger verdient heigi, de dä.

Der Räscht vor Tour isch schön gsy, ha mi bim Heicho über di Schlange vom Helvetiaplatz zum Burgereziu g’wungeret (mitem Tram wäret der schnäuer!) u über di vile Schtadtoffroader dört drinn; uf der angere Sytte han i ungerdesse chli Verständnis für die entwicklet, bi däm Zueschtang vo de Bärner Strasse…

So, das het müesse gseit sy, u itz schlöinigscht unger d Dusche, bi no zum Znacht yglade.

U we mer is scho uf ds Tiefbouamt hei ygschosse: Vor nes paar Jahr hei sy ja en Aktion gstartet für d Velofahrer i dere Generation usdsrotte: Velofaue bi de Tramhautsteue. Das isch das Arrangschmo wo der Velostreife plötzlech ufhört u me der 10cm höch Trottoirrand i syre Spur vor sech hett, me nach linggs vor nes Outo mues uswyche u de wi der Odysseus zwüsche Skylla (Trottoir) und Chariptis (Tramgleis) imne 40cm breite Streife darf dürebalanciere. Bravo, würklech guet gmacht, d Velo aus Verchehrsberuhiger ygsetzt, Pedau-Schtogufaue rächts u Pneuychlemmer linggs u no chli linggser d Outo mit fletschende Zähn u hinger eim ds Tram mit emne Brämswäg vo 14m.

oder: Früecher hei d Büezer no gwüsst, was e glatti Sach isch.

Der Bund schrybt hüt, das im Kanton Bärn d Bevöukerig nume schwach wachsi u der Kanton dört zu de Schlussliechter ghöri.

Syt zwo Wuche plaaget mi der Verdacht, dä Trend sygi husgmacht. Sitt zwo Wuche nämlech han i Kompensationszyt, bi ds Bärn u wider ufem Velo ungerwäggs. I mues vilech no säge, das ja eigentlech Blogyträg über ds Velofaare us Tradition em Fritteli sys Metier sy, aber i grase itz ungerem Zun düre u briche das Monopol us aktuellem sozio-politischem Aalass. (U i hoffe, der Fritteli gsäch di Not y u verzög mer hie.)

Item, i bi auso ds Bärn ufem Velo ungerwäggs, uf mym aute Renner u Renner sy eifach hert pumpet. Das tönt nachemne Detail, isch hie aber wäsentelch u erklärt vilech o, werum sech der Fritteli no nid über das Problem het usglaa; är dünkt mi mindischtens äbeso betroffe, aber er het ja ke Renner u drum o nid ganz eso hert pumpet, u mit däm Hiwys chöme mer der Sach scho neecher.

Auso, i fahre schier täglech vom Thunplatz zum Helvetiaplatz d Jungfroustrass dstürab. Dört sy si ja scho lenger am pickle u baggere, u einisch hei sy e zümftige Teu vor ufgschrissne Strass wider ausphautiert gha, u wider ufgschrisse u nöi asphautiert, oder eifach zviu Asphaut gha und es paar Hüüfeli gmacht u chli aatäberlet. Über di Bùggupischte wo derby isch usecho, faart me itz mit Garacho vom Thunplatz obenabe. U mit däm Spiid u de hert pumpete Pnöö rasslet u houperet u schüttlet u vibriert u schlaat u rüttlet u zitteret u sheiket u polet u schtüpft u schanghanigzigerlifisionöögelet das eim der Sattu zwüsche de Bei umenang das i mi nüm frage, obi mau Ching wott, sondern obi äch no cha ha wen i bin Helvetiaplatz ungen aachume! Was söu de das, gitts es Edikt usem Münschter wo d Castrati wider yfüert, oder het ds Tiefbouamt der Strassename z wörtlech gno u gfunge “so, u wär’s nid isch, wirds itz!”?

I hoffe eifach, bevor sy d Boumaschine mitnäme, mieche sy no e letschti Schicht Asphaut drüber, schüsch gsen i schwarz für e Kanton.

Das mi der Mänu aus “alternder beirtrinkenden Fürsprecher” bezeichnet, isch ja scho es schtarchs Schtück. Won i doch so guet wi nie i ds Bier luege u überhoupt nid aut, nämlech…

Guet, das mitem Bier het natürlech sy Hingergrund, u dank däm Mupf vom Mänu schaffts o die Episode no online:

Letschti bin i mitem Tschabi bi Eggers ds Worb ga zwickle, d.h. Zwickubier i di mitbrachte Fläsche abfüue. Ds Publikum bi däm Aalas isch eher - wi söu i säge - rural, u de Gschpräch naa sy pro Nase scho mee aus ei Jeton i di schöni Zapfmaschine usem 19. Jahrhundert grütscht.

Bevor mer wider ggange sy, bin i i Schober näbedrann a ds Pissoir gschtange, da chöme zwe jungi (öppe i Mänus Auter) Handwärker yne, holeye wy nach 5 Jeton, schtö vor ne Schüssle u mache dert zum Schiffe e Riisekomedi won i itz hie nid im Wortprotokoll widergibe. Irgendwie ischs de o bi ine aacho, das sy nid alei dert inne sy gsy, da hout mi der eint aa:

“Machsch Du hie o mitem Elektrisch?”
I han im gseit, dasi eifach chäm cho Bier hole, da het er gmeint
“Itz han i gmeint, Du tägsch o hie wärche. Was bisch de Du für eine?”
“I bin e Fürsprächer.” han im gseit, da macht er groossi Ouge u schtuunet:
“Ja lääk, e Fürspräch wo Bier suuft! Das gitts ja nid! Chash is de o grad eis zahle!”

U er isch mit sym Kolleg im Schlepptou johlend dervogwankt u het de afe im Gang usse der Hoselade zue pracht.

Judihui, sie kriecht!! Ohne Schleimspur und ohne die Hörnli zu strecken, aber tapfer bis zum Schlafbefehl.

Die Installation auf dem USB-Stick klapte nicht, muss wohl am Stick liegen, aber mit einer angschlossenen USB-Harddisk liefs problemlos. Jetzt noch ein wenig Samba tanzen und bereit stehen die Dateien im lokalen Netz.